PDA

View Full Version : البوم انغام" نفسى احبه" .... للشياكه ملامح جديده و شلال افكار فى الحب و احساس



M O U
09-06-2009, 11:14 PM
ازيكم يا شباب

بما ان القسم ده بقى كوكتيل .. مزيكا على رياضه على فن على مسلسلات على اجتماعيات
فقلت اطرح فيه دعوه للاستماع و الاستمتاع بالبوم انغام الاخير ( نفسى احبه ) .. البوم فى رأيى فيه اغنيتين بس مثلاً الى مش قد كده كأفكار .. باقى الألبوم افكار اغانى فى الحب و الحياه فى رأيى مبتكره او جديده و فى نفس الوقت تتميز بأناقه و شياكه متناهيه من حيث الالحان او الكلام او التوزيع الموسيقى الى كان حسن الشافعى احد ابطاله و معاه عثام الشريطى و عوده لطيفه من مدكور فى ان ان بى شيك جداً ...

الألبوم بيبداً باغنيه لو اعيش معاه

بدايه اوركاستراليه تهيئك و تدخلك عالم خاص بانغام و جديد ايضاً عليها بس بيحتفظ بشياكتها
وتدخل بكوبليه يااه لو اعيش
و يدخل معاه بعد كده مقسوم هادى جميل و شيك زى ما وضحت فى بدايه كلامى فى الألبوم .. بيز جيتار واضح و صريح به بعض السلابات الخفيفه.. و كوردات الكترك جيتار تلعب مقسوم باسلوب حلو مختلف...لمسات بيانو مع صوت انغام و مع ردات البيز جيتار ,, و بتتبادل مع الوتريات الأوركستراليه ...
اما لازمه الاغنيه الى فيها عود و ناى و اوركسترا كامله و معاهم البيز جيتار فى تناغم حلو بين الات كهربيه و الات اوركستراليه و كل ده فى غلاف المقسوم الهادى جداً متماشى مع صوت انغام برشاقه
وده الى عجبنى ان المقسوم مش حشو ..و مش ملعوب فيه بالكترونيات .. بالعكس واضح بس مغلف بلمسات جميله من البيانو و الاوركسترا و بيز و الكترك جيتار متناغمين كلهم .. اغنيه فيها تمنى جميل لو اعيش معاه و ياااااه .!

تانى اغنيه هى حبيبى مالك

دخله سريعه مفاجئه بالكيبوردز ... لم تعجبنى كثيراً .. حلوه بس عاديه .. صوت انغام حلو بس تحس الغنوه دى لو اتعملت هاديه اوى زى قلبك مثلاً و بلحن هادى اوى .. كانت هتبقى قنبله مدويه
بالذات كوبليه :
دى عينيك مش هى هى
شايله القسيه
انا عايزه افهم فيه ايه
فين ابتسامتك
مالك سلامتك ؟!

مش راكبه اوى انها تبقى سريعه كده ... بس عموماً دى احدى هفوات الألبوم او الى لم تستهوينى فقط لأنى كنت افضلها اغنيه هاديه .. بس طبعاًُ تنوع الايقاع مطلوب عشان تفادى الرتابه .

ثالث اغنيه : نفسى احبه

قنبله جديده تماماً لأنغام .. لحن رهيب .. كلام رومانسى يعلو بالاحساس لأعلى مكاان .. اغنيه تكيف الراجل اما يسمعها بصوت زى صوت انغام غايه فى الشياكه .. غايه فى الرومانسيه ..

دخله بيانو فيها غموض ..ومعاها الوتريات بعيده .. و تدخل انغام بالكلمات المليئه بالاحساس و لحن مليان احساس رومانسى بصوت انغام

نفسى احبك حب تانى تانى
حب فيه كل المعانى
حب يخلى غرورك يعلى .. ويخليك يا حبيبى انانى

يا نهاااار ....حاله استسلام جميله فى الحب .. ملك حبيبها .. و يخليك يا حبيبى انانى و غرورك يعلى .. اوفففففف بجد .. عبقرى يا بهاء الدين
و الداهيه الى اسمه خالد عز ... بامانه عمل لحن لابس انغام .. تكرار كلمة تانى تانى تانى دى و يعلى يعلى يعلى .. بيبعد بيك كمستمع لابعد منطقه فى الخيال للحب ... بيسافر بيك لحته بره كل الاغانى الحب الى ممكن تسمعها ..
باقى الكلمات اللى فى الغنوه مش حاقدر اديها حقها ...و تكرار انغام لأول كوبليه تانى بس بلحن مختلف قليلاً يؤكد الحاله الرومانسيه والاستسلام الشديد للمحبوبه .. و ما اجمله

التوزيع الاوركسترالى المخلوط ببالات الكهربيه البسيطه مثل البيز جيتار و الاكوستك و اعتماد ايقاع الغنوه على البيركشنز .. خلق حاله حالمه جميله جداً .. و قيادة عصام الشريطى الموزع للأوركسترا .. سيطرت على الحاله الشرقيه ,, و سمحت بوجود ردات من البيز و الوتريات جميله متلائمه مع غناء انغغام .. كانهم فاهمين الكلام
عموماً من اجمل الحالات الرومانسيه الخالصه.

رابع اغنيه : ساعات كتير

الايقاع بيرجع يعلى تاني .. بس المره دى المعلم حسن الشافعى
توزيع شقى و مجرم اجرام رهيب .. عشان حاجه واحده .. احتفظ برضه بلمسات شيك جداً حتى فى سرعة الايقاع و المحايله الى فى الاغنيه

مقدمه جميله جداً .. اول ثانيتين مع دخول الالكترك برتم موسيقى الريجييه .. و فجأة تدخل معاه اله نفخ شبيهه بصوت الكلارينت ,, و يبدأ ايقاع شيك جداً رتم متوسط السرعه و مصاحب له الات النفخ من الترومبت و سكسفون .. مستعملين بحرفنه وشقاوه بطول التوزيع
رجوع لزمات فوكالز الخاصه بانغام باهاتها الشيك جداُ مع الرتم السريع ده و تعلى مع الات النفخ

كلمات رقيقه تحمل كبرياء واحده بتحب رغم حبها الشديد و بيتضح بشده فى كوبليه
باموت من الشوق و عزة نفسى مانعانى

و طبعاً استغل الشافعى تقلب و تردد حالة الأغنيه بانها ساعات كتير بتحلم بنظره من عينيه و بعدها ساعات كتير ترجع و تقول مش راحعه ليه من كبريائها
و اكد على ده فى اخر دفيفه لما انغام تقول و سعات كتير .. و مره طبله و مره وتريات تعبير عن حالات التردد .
و لازمة الأغنيه ممتعه لأقصى درجه معموله بمزاج اوى من الشافعى , و لحن محمد النادى بسيط و كالعادة يتسم بالهدوء المواكب للرتم السريع الشقى .


خامس اغنيه : دلوقتى احسن

فكره الفراق و الخداع و الغش .. وانها حالياً أفضل مما كان ... حاجه زى فكره يهمك في ايه لدياب

بس الفارق هنا هو التناول الموسيقى و كيفيه تنويع المقسوم بين مقسوم يعبر عن حاله الارتياح و الفرحه او الاستقرار .. و المقسوم الحزين القاعد الى يعبر عن اسى الذكريات و الأحلام المرسومه

اللكلام عادى او زى المعتادين عليه فى اغانى الهجر و الفراق و هكذا

اللحن والتوزيع هما الأبطال
التوزيع منفذ باسلوب الحكايه

بيبدأ بمقدمه قويه و تدخل انغام مع نغمات البيانو و تقول
دلوقتى احسن !!!
على الأقل ما بقتش باحزن ان عمره ما حس بيه
انا بس باندم عشان زمان ما قدرنش افهم ان هو ما كنش ليا

و معاها الوتريات الحزينه و اربيجات البيانو و بيز جيتار هادئ

و تبدأ فى سرد الحكايه و المأساة فى الخداع و الغش
و بيبدأ معاها الوتريات و الدرامز بما يواكب باسترجاع الذكريات زى فلاش باك

دخل عليا بكل حاجه باحبها .. الى اخر الكوبليه
و فجأة يعود اللحن لدلوقتى احسن .. يعنى الواقع الحالى .. ان بعد كل ده دلقوتى احسن.. فتنتقل الموسيقى لمقسوم مفرح .. يدل على السعادة الرضا .. و صوت الكيبورد جديد مساعد على ايصال الفكره اياها و ده بيبدأ من الددقيقه 1 و 45 ثانيه , و قانون و رق ووتريات
و فجأة تحصل وقفة و كمان حزين و ترجع تسرد انغام ذكرياتها تانى و ترجع الدرامز برتم اسلوب الحكايه و الذكريات للغش
و تدخل انغام بكوبليه :
انا قلت ده الى غرامه حيرجع سنينى و ياخدنى معاه لدنيا تانيه ما عشتهاش .. و ترد عليها كمنجه حزينه
و تكمل الكوبليه مع تحول المزيكا لتخت شرقى مع كوبليه
كان قلبى نقطه ضعفى .. بس خلاص نسيت ... لنجد الرق و القاننون المره دى فى حزن بدل فرحه ..مع الاحتفاظ بنفس خط البيز جيتار
و ثم يعود التوزيع تانى لأسلوب الحكايه العادى مع الدرامز ... و تنتهى بجمله دلوقتى احسن رغم كل ده... و تختفى الموسيقى .. ولا نجد سوى قفله من البيانو ينهى بها الحكايه و يضع نهايه جميله و هى انه دلوقتى احسن . و اعجبنى النهايه يانها فعلاً تخلصت من الذكريات و اصبحت اقوى و دلقتى احسن .



سادس اغني : مهزومه

اسم يخض ... ملئ بالضعف والانكسار اعتراف صريح بان واحده مهزومه
بس الجديد هنا فى الفكره انها تخيلت انه فاكرها مهزومه و ضعيفه و مالهاش طموح .. بس فكره غلط لأنها اقوى من كده و بتنتهى الأغنيه بانها بتقوله هو انت الى مهزوم و ضعيــــــف ... فكره قويه جداً و جديده .. وتناول جديد للانكسار و القوة فى نفس الوقت ,, و احيى امير طعيمه على الكلمات او الفكره عموماً

التوزيع بيبدأ بدايه قويه اوركستراليه بكل ادواتها من بيانو ووتريات و درامز و الات نفخ
دخله تشعرك بجو اغانى فيروز العتيق
و بعد هدوء الموسيقى و تقديم البيانو و تمهيده لصوت انغام
تدخل انغام

مهزومه ضعيفه ماليش طموح
انا عايشة بدموعى مع الجروح
غلطانه ندمانه على حبنا
مش ده اللى بتقوله عليا

خالد عز كالعادة لحن درامى تحس فيه باداء مسرحى خصوصاً بجو الاوركسترا
انغام بتدخل بصوت واحده فعلاً مهزومه ضعيفه ... و فجأة تتصدم اما نبرة صوتها تتغير و تقوله
" مش ده اللى بتقوله عليا " ونبرة صوتها هنا اتغيرت و اتسمت بالقوة

و بعدها تنتقل الأغنيه الى رتم سلو روك مع الكترك جيتار و بيز جيتار و صوت اوركسترا فى الخلفيه مساند و تبدأ انغام فى تحول بقول
ما تفوق !! أنا من غيرك او بيك .. مش واقفة حياتى عليك و باعيش و هاعيش
وهواك .. كان غلطه تمنها كبير .. أنا جيت على نفسى كتير و خلاص مابجيش
مهزومه ضعيفه ماليش طموح

و يستمر درامز الروك بهدوء و يدخل اصلان بلمسه الكترك هادى من غير اى دستورشن و تنسجم معاه كمنجات الأوركسترا و همهمة جميله من انغام , بعدها تشعر بتغير درامى فى جو الأغنيه و تطغى الاوركسترا على الموسيقى فى فاصل قصير تمهيداً لدخول انغام بالكوبليه التانى

ضحيت عشانك قد ايه
كان وهم لوحدى انا عايشه فيه
وليالى انا كنت مسلمه .. بس الحقيقه ساعات بتبقى مؤلمه

كل ده الوتريات بدون رتم روك .. و يعود رتم الروك بالدرامز الى هتكون هى الاداة المحركه فى الجزء القادم مع تحول انغام عندما تقول :
وساعات بنغمض عينا ساعات .. و تعدى علينا حاجات
و فى يوم بنشوف
وخلاص
بعد الى انا عشته معاك .. داوقتى بقيت شايفاك . وبقيت مكشوف

بتفاعل البيز جيتار و الدرامز والسنير درامز لايف اعطت خط درامى قوى مع الاوركسترا ,, بحدوث نقله مفاجئه وانفعال مفاجئ فى اللحن غريب جداًُ على الأذن فى الدقيقه 2 و 50 ثانيه
و تعود انغام للكوبليه الرئيسى فجأة
ما تفوق !! أنا من غيرك او بيك .. مش واقفة حياتى عليك و باعيش و هاعيش
وهواك .. كان غلطه تمنها كبير .. أنا جيت على نفسى كتير و خلاص مابجيش

واثناء كل ده كل الالات بتعلن نفس الانفعال سواء الاوركسترا الرهيبه المرعبه او الدرامز الى اصبحت عنيفه او البيز جيتار الى اصبح له شخصيه فى هذا الألبوم .. نادراً ما نسمعه هكذا

الى جملة ما بحييييش .. و تحسها هتقفل الأغنيه خلاص مع سكوت كل الموسيقى من حولها فى نهايه مسرحيه دراميه ..
و تنتهى بقولها .. مهزوووم ضعييف !!!!

و ما اجملها نهايه و ما اضعفها بصوت ضعيف . بعد كل القوة الى كانت قبلها بثوانى ..

اغنيه ميزتها لم تعتمد على الاوركسترا فقط الى كانت هتأدى الغرض برضه بكل تقلبات التوزيع .. انما دعمها اكتر بجو سلو روك خفيف فى تناسق شيك جداً و راقى جداً لكسر رتابه الاوركسترا واضافة لمسه عصريه .
اغنيه قويه جداً.. و علامة فى حياة انغام فى رأيى .. زيها زى اغنيه ما انساش انا لأصالة
برافو امير طعيمه و خالد عز والشريطى .. فريق مدمر بأمانه و فهموا صوت انغام كويس


سابع اغنيه : فى واحده بتحبك

فكره حب من طرف واحد بس تناول جديد جداً من ناحيه الكلمات
نادر عبد الله عمل كلام حلو وفيه نبره صعبانيه جميله

لحن وليد سعد كالعادة معتمد على جمل قصيرة متناسقة

احساس انغام غايه الجمال كعادتها .. و توزيع مقسوم قاعد جميل متفاعل مع اللحن باسلوب حلو
رغم فرق امكانيات وتريات صقر عن اوركيسترا براغ او غيرها اللى لمستهم كانت واضحه اوى فى الوجه الأول من الألبوم

اجمل حزئيه
ياللى انت مش دريان بيه
شوف انت ترضى بايه ليا
لو مت فيا تعيشنى !!
لو سبتنى تموت فياَ!!

تعبير جميل و رقيق و جديد على الودن اخر شطرين عشان كده الغنوه اعتمدت عليه

المقسوم هنا لم يأت باى جديد .. صوت الكيبورد كان مش ظريف اوي .. اعطى احساس بالقدامه.. بس عموماً حاله حلوه


ثامن اغنيه : لو نصارح بعض

كلام مش مربوط اوى مع اللحن.. اللحن تحسه حر مش ممسوك ببدايه ونهايه
باحس بتوهان فى نصف الأغنيه .. فلم تعجبنى هذه الأغنيه و لا اعتقد ان الموزع اجاد التعامل معااها
خلط الار ان بى بالجاز .. و السكته الى فى الاخر دى.. لم تفد الأغنيه و حشو فى رأيى عشان مد التوزيع وخلاص .. الأغنيه مفيش فيها جديد اوى او مش بقوى باقى الأغانى .


تاسع اغنيه : عشت سنين

لأصحاب الحس و التذوق الرفيع فقط
اغنيه ترجعك لأيام الزمن القديم . انغام بتاعة زماااااااااااااان اوى فى بدايتها الأغانى اللى تحمل افكار جديده تماماً و هاديه و رقيقه ..

المره دى مع الداهيه : بهاء الدين محمد اللى يستحق فى رأيى اقوى فكره فى 2009 رغم بساطتها المفرطه الا انه لم يتعرض اى شاعر قبل كده لتلك الفكره الجهنميه

باختصار الأغنيه دى داخل 85 أو 90 % من البيوت المصريه خصوصاً الأهل
واحد وواحده اتجوزوا جواز صالونات او ما شابه

الزوجه لم تحب زوجها من البدايه .. و الزوج متفانى فى حبه ... و بعد مدة كبيره تكتشف حبها المفرط له و انها ماكنش تنفع تحب غيره .!!

اول ما سمعت الأغنيه دى كنت باسقف له والله على الكلمات والتناول العبقرى بشدة بجد فى الجول يا بهاء الدين .. و متفرد فى اسلوب الحكايه دى .

طبعاُ كلمات بهذه الثقل و العمق و الجمال راحت لعمنا عمار الشريعى عشان يضيف لها جو الحكايه الطويله و لم يبخل على الكلمات و الاحاسيس الجميله و قسم الللحن لـ 3 افكار :
مقدمة
حكايه
و نهايه ( نتيجه )

تتكرر مع كل كوبليه بشكل مختلف وكلمات مختلفه و النهايه مشتركه و هى فى كلمات :

مالقتش فى الدنيا دى قلب زى قلبك

دلوقتى من قلبى: باقولك اهه باحبك !

حب عدى حدوود خيالك

و ما اورع لحن اخر شطر ده اما تطول فى قفلة الأغنيه و تقول حدوووووووود خيااااالك بصوتها الى مليان رقه و صدق .. بتموت بجد

اغنيه تستحق اوسكار فى الفكره لوحدها فى رأيى

التوزيع كالعادة بيعتمد على التنقل بين المقسوم و التيمه الغربيه باسلوب الحكايه رغم اختلاف الموزع لأن المره دى واحد اسمه وليد !!!
الوتريات اكيد عمار الشريعى شارك فى تأليفها الى جانب اللحن

عمومأً رغم التوزيع تقليدى شويه بس قعلاً الأغنيه عموماً قويه جداً و نادرة الوجود كفكرة .


الأغنيه العاشرة : ضى عينيك

الحمد لله مدكور صالحنى اخيراً باغنيه شيك و حلوه و تليق بانغام عكس تانى اغنيه
و قدم انغام فى شكل موسيقى جديد لها و هو الأر ان بى
وكأن مفيش غير انغام الى غنى هذا اللون الموسيقى .. متنفذ بحرفنه اوى ..
لازمه جيتار بتيمه حلوه هاديه
التيمه المتكرره بطول الأغنيه متناسقة اوى مع طبقة صوت انغام واللحن .. مفيش حاجه اعلى من حاجه .. كل النسب مضبوطه و بسيطه اوى و ده الى شدنى و استعجبت ان مدكور تخلى عن حشوه الزائد فى اغنياته الأخيره و رزعه !

مقدمه لا ادرى ان كانت مقتبسة ولا لأ ... بس تفتح النفس والودن على انك عايز تسمع المزيكا و الكلام الى هيتقال عليهه
وتدخل انغام سخنه على طول

شعورى و كل احساسى خدونى انا ليك
بقيت اقربلى من نفسى و باموت انا فيك
حبيبى الدنيا ضحكتلى بضى عينيك
ده انا عمرى الى كان قبلك ما عشتش فيه

اللحن هنا جميل جداً من خالد عز الى تحس فيه بان انغام ادته باحتراف و نفذت موسيقته باحتراف كلون الار ان بى
بعد كده باقى الكلمات مش بقوة الدخله دى

بس المميز هو اللحن والتوزيع و نهاية الأغنيه اللى كانت مميزه اوى .. أعجبتنى بأمانه
اوسو و جيتاره الاكوستك المره دى عمل تيمه جميله بطول الغنوه اعطت جو جميل جداًُ من الراحه


الأغنيه الحاديه عشر : مش فى بالك


نوع الأغنيه تحسه قريب من شيرين حتى من الانترو و الوتريات الى فى البدايه

انغام ادتها كويس عموماُ .. التوزيع حلو فيها بس مش الى هو مبهر او فيه بساطه ححلوه ..

بس الغنوه عموماً كلحن و كلام تتفوق على التوزيع .... بس ميزته الوحيده انه كان متنقل مع تنقلات اللحن مش ثابت


الأغنيه الثانيه عشر : والله حلوه

مسك الختام كما يقولون
اختيار جميل جداً و اشيك من الحياه و الأمل فى البومها السابق
انغام .. اغنيه بدأت تميل للون ده من البومها السابق عندما غنت : مفيش حياه من غير امل .. و اعادت غناء اغنيه منير القديمه ( أشكى لمين ) .. المره دى اكتفت باغنيه واحده اجتماعيه

تدعو لحب الحياه و ساعه لربك و ساعه لقلبك ... ممكن ناس كتير تعترض على الفكره عموماً
بس اعجبنى جرأتها فى الاختيار
و اعجبنى اكتر انها مش اغنيه برنامج و انها اكتفت بها فى الألبوم لتكمل الحاله الجميله

كلماتها عموماً جميله جداً .. اللحن اسهل ما يكون و هو ده المطلوب .. لتوصييل معانى و تبسيط الحياه ,
كعادة الشافعى اثبت بصمته الخاصه فى لون مقسوم مخلوط بموسيقى الجاز الجميله .. عمل توزيع رائع للأسف مش واخد حقه زى ساعات كتير .. مع انه اى حد حابب مزيكا حيدوب فى الأغنيه دى و توزيعها الى بيحمل لمسات فى منتهى الشياكه من جيتار و بيز .. و بيانو .. و لمسه ناى حزينه
و يتمم كل ذلك فاصل جميل بصوت انغام مع الناى ...

دخلة الأغنيه عموماً هاديه تمهد لنهاية الألبوم عموماً .. هدووء شديد كأنه بيقفل فعلاً الألبوم باخر اغنيه .. و تدخل همهمة انغام و بعدها تبدأ بالغناء مع مقسوم جميل مصحوب بوتريات ( خااااصة بالششافعى فقط بصمته واضحه هنا اوى صوت الوتريات )
رغم وجود تشابه طفيف بين وترياته هنا و تيمه اغنيه قديمه لداليدا

البيز كعادته صاحب شخصيه و له نصيبه من الاغنيه بسلاباته البسيه بين الحين و الأخر
وصولو الكترك جيتار بلون الجاز غايه الهدوء و الجمال .. وتدخل انغام بعدها بالفوكال و الناى

الألبوم فى مجمله حاله جميله جداً .. رغم تعدد اغانيه .. ممكن كانت تكتفى ب10 اغنيات ..لو استغنت عن ( لو نصارح بعض - حبيبى مالك ) غير مؤثرين اوى

بس باقى الأغانى تعمل البوم لوحدها ... و بافكارها .

اتمنى تستمتعوا باالالوم زى ما انا استمتعت

و اسف جداً جداً للاطاله .. بس حبيت اعط للشافعى والشريطى و خالد عز و الشريعى و انغام طبعاً حقهم على العمل ده .

[ zouzou ]
09-06-2009, 11:24 PM
الالبوم فعلا جناان
اكتر اغنيه بموت فيها بجد وبحسها اوى وبتمسنى هى اغنية دلوقتى احسن

Yanni
09-06-2009, 11:24 PM
Fantastic Topic Ahmed
i love this songs in da Album :saat Keteer (Y) , Law Aeesh Maaa , Nefsy A7ebak , Malak , Wallahi 7elwa

Howii
09-06-2009, 11:50 PM
مممم .. مش عارفه ليه حاسه إني مختلفه معاك فى كذا نقطه .. على سبيل المثال :: اغنية "مهزومه" معجبتنيش زي ما انت بتقول .. يمكن الاغنيه كلامها قوي بس محستوش لايق على أنغام .. حسيت صوتها فى الاغنيه "مهزوم" مش قوي .. الاغنيه دي كانت محتاجه حد تاني غير أنغام يغنيها
أغنية لو نصارح بعض .. مش قادره أفهم ليه معجبتكش .. الاغنيه رائعه من وجهة نظري .. أنا حاسه أنها يعتبر فيها تجديد بالنسبه لأنغام ..
أغنية حبيبي مالك ..أغنيه شقيه .. حبيبه عايزه تشوف حبيبها ماله وفيه أيه ، حاسه إنها مكنش ينفع أبدا تكون هاديه
أغنية دلوقتي أحسن .. مش حاسه ان كلامها مستهلك على الاطلاق .. وشايفه إنها من أقوي أغانى الالبوم
ضي عينيك .. لو أعيش معاك .. ساعات كتير .. من أحب اغاني الالبوم ليا .. وبجد إحساس أنغام جميل أوي كعادتها يعني
فيه اغانى الصراحه فى الالبوم ماركزتش فيهم أوي بس ده ما يمنعش إن الالبوم ده من أقوي الالبومات اللى نزلت السنه .. هو و ألبوم شيرين
شكرا ليك
تعديل صغير :: الالبوم إسمه نفسي أحبك وليس نفسي أحبه

MasterMind™
09-07-2009, 12:56 AM
thanks for you

M O U
09-07-2009, 02:20 AM
thnx for replies guys

M O U
09-07-2009, 02:22 AM
مممم .. مش عارفه ليه حاسه إني مختلفه معاك فى كذا نقطه .. على سبيل المثال :: اغنية "مهزومه" معجبتنيش زي ما انت بتقول .. يمكن الاغنيه كلامها قوي بس محستوش لايق على أنغام .. حسيت صوتها فى الاغنيه "مهزوم" مش قوي .. الاغنيه دي كانت محتاجه حد تاني غير أنغام يغنيها

أغنية لو نصارح بعض .. مش قادره أفهم ليه معجبتكش .. الاغنيه رائعه من وجهة نظري .. أنا حاسه أنها يعتبر فيها تجديد بالنسبه لأنغام ..
أغنية حبيبي مالك ..أغنيه شقيه .. حبيبه عايزه تشوف حبيبها ماله وفيه أيه ، حاسه إنها مكنش ينفع أبدا تكون هاديه
أغنية دلوقتي أحسن .. مش حاسه ان كلامها مستهلك على الاطلاق .. وشايفه إنها من أقوي أغانى الالبوم
ضي عينيك .. لو أعيش معاك .. ساعات كتير .. من أحب اغاني الالبوم ليا .. وبجد إحساس أنغام جميل أوي كعادتها يعني
فيه اغانى الصراحه فى الالبوم ماركزتش فيهم أوي بس ده ما يمنعش إن الالبوم ده من أقوي الالبومات اللى نزلت السنه .. هو و ألبوم شيرين
شكرا ليك

تعديل صغير :: الالبوم إسمه نفسي أحبك وليس نفسي أحبه


اان ماقصدش فى دلوقتى احسن ان الكلام مستهلك .. قصدى فكرة سرد حكايه الغش.. زيها زى اغنيه كان وهم لأصاله فى اخر البوم .. زيها زى اغنيه تضحك عليا بهديه من البوم انغام القديم ( ليه سيبتها ) .. فكره مستهلكه بس تناول اللحن و التوزيع المره دى فيهم افكار حلوه لم تنفذ مع انغام قبل كده ولا مع مطربات تانيين على قد ما سمعت.. طبعاً فيروز خارج الليست

Micky
09-07-2009, 03:21 AM
البووووووووووووم انغام فعلا جامد اخر حاجه

ويستحق انو يتسمع باتقان

تسلم ايديك يا جميل على التوبيك

M O U
09-07-2009, 07:49 PM
thnx micky

عاشق الاسطورة
09-07-2009, 07:56 PM
ألبوم انغام جامد جداااااااااااااااااااا
و خصوصا مهزومة

و شكرا على التوبيك

M O U
09-07-2009, 08:14 PM
ألبوم انغام جامد جداااااااااااااااااااا
و خصوصا مهزومة

و شكرا على التوبيك
العفو

safy
09-07-2009, 08:29 PM
أنا بعتبر ألبوم أنغام أحسن ألبوم بعد عمرو و أحلى أغاني فيه
لو نصارح بعض-ضي عنيك-مهزومه
ألبوم حلو أوي بجد
thanks alot

mohamed keshk
09-07-2009, 08:50 PM
فعلا البوم للتاريخ احسن البوم السنة دى بعد عمرو طبعا
وهشام عباس حلو كمان

CuteKimo
09-07-2009, 09:35 PM
البوم قوي جدا جدا احساس انغام فيه فوق الوصف وموسيقىى الالبوم راقية جدا
بس للاسف الالبوم اتظلم بميعاد نزوله لان الناس ملحقتش تسمعه
شكرا يا محمد لتحليلك واحييك على كلمة البوم شيك لانها افضل كلمة توصف الالبوم

عomar
09-07-2009, 10:39 PM
شكرااااااااااااااااا جزيلاااااااااااااااااا

S A L S A .
09-08-2009, 12:30 AM
البوم حلو جدا وكنت بسمعه كتير اول ما نزل ...بس ماأدتهوش حقه كويس لان نزل بعده عمرو وهشام .
متفق معاك فى معظم النقط ...بس محتاج أسمعه تانى كويس
كمان احب اشكرك انك قدمتلى خدمه قويه جدا ...انك فهمتنى أغنيه مهزومه ..انا كنت بحسب نفسى ذكى :d.
...كنت مستغرب أوى من التناقض اللى فيها وماكنتش فاهم يعنى ايه : مش ده اللى بتقولو عليا أنا ..

Mr.Zero
09-08-2009, 12:38 AM
انا مبعرفش ابعبر عن شعورى تجاه الالبوم:d
بس البوم راقى جدا
وحشتنا ايامك يا مو

Hamlet
09-08-2009, 02:15 AM
أرقـى ألبـوم في صيف 2009

يعيبه عدم تنوعه موسيقياً , لكن كألحـان وكلمـات وآداء يُعتبر خـرافة

سيف
09-08-2009, 02:36 AM
البوم نضيف..........بس للاسف اتظلم وماخدش حقة

انا بموت فى اغنية مهزومة ..حاجة تحفة بجد :)

الف شكر ليك ع الموضوع يا احمد

ya$$oo
09-08-2009, 02:58 AM
الالبوم ده جااااااااااااااااااااامد جدا بالذات في وحده بتحبك



YaSSeR EL GhaNNaM

Ahmed El Masry
09-08-2009, 03:05 AM
ألبوم جيد على مستوى أفكار المواضيع المطروحة فيه بس عادى موسيقيا
ومش أفضل ماقدمت أنغام طبعا
بس يظل إحساسها فوق كل شئ فعلا
شكرا ليك على التحليل الجميل :)

M O U
09-08-2009, 03:20 AM
العفو يا جماعه و يا رب يكون التحليل سمعكوا الالبوم تانى

M O U
09-08-2009, 03:29 AM
البوم قوي جدا جدا احساس انغام فيه فوق الوصف وموسيقىى الالبوم راقية جدا
بس للاسف الالبوم اتظلم بميعاد نزوله لان الناس ملحقتش تسمعه
شكرا يا محمد لتحليلك واحييك على كلمة البوم شيك لانها افضل كلمة توصف الالبوم

العفو يا حج.... و كلمة شيك باحس ان انغام اكتر مطربه تليق بها الكلمه دى




البوم حلو جدا وكنت بسمعه كتير اول ما نزل ...بس ماأدتهوش حقه كويس لان نزل بعده عمرو وهشام .

متفق معاك فى معظم النقط ...بس محتاج أسمعه تانى كويس
كمان احب اشكرك انك قدمتلى خدمه قويه جدا ...انك فهمتنى أغنيه مهزومه ..انا كنت بحسب نفسى ذكى :d.
...كنت مستغرب أوى من التناقض اللى فيها وماكنتش فاهم يعنى ايه : مش ده اللى بتقولو عليا أنا ..



اى خدعه يا صلصه... احنا فى الخدمه دايماً
و الشتا داخله و انغام هتعمل احلى شغل
وركز فى الأفكار عشان بجد عبقريه




انا مبعرفش ابعبر عن شعورى تجاه الالبوم:d

بس البوم راقى جدا

وحشتنا ايامك يا مو


ادينى رجعتلك ههههه , مش لازم تبعبر يا ايمن .. المهم تستمتع بيه او تسمعه بروقان عشان ياخد حقه بس




أرقـى ألبـوم في صيف 2009


يعيبه عدم تنوعه موسيقياً , لكن كألحـان وكلمـات وآداء يُعتبر خـرافة




الموسيقى وحهها الأول فيه 4 اغانى يحملوا نفس السمات بس مع اختلاف الشكل الموسيقى .. بس نفس الألات.. زى مهزومه و لو اعيش معاه و نفسى احبك .. كلهم بنفس الالات تقريباً بس مره مع سلو روك ... مره مع مقسوم .. مره مع توزيع اوركسترالى بحت...فمدى روح فقط عامه او شكل عام له و هو لمسه الاوركسترا و تنوع اداءها على مدار الألبوم.


البوم نضيف..........بس للاسف اتظلم وماخدش حقة

انا بموت فى اغنية مهزومة ..حاجة تحفة بجد :)

الف شكر ليك ع الموضوع يا احمد


العفو يا سيف.. و انا عموماً جبت السنه دى سى دى عمرو و انغام عشان ماظلمش حد .. الى يعجبنى اشتريله البومه دون تردد لأن السي دى له مذاق و بيبقى ذكرى و تكريم لصاحب الالبوم فى ننظرى




ألبوم جيد على مستوى أفكار المواضيع المطروحة فيه بس عادى موسيقيا


ومش أفضل ماقدمت أنغام طبعا
بس يظل إحساسها فوق كل شئ فعلا

شكرا ليك على التحليل الجميل :)


ممكن اكون متحيز... بس جيد دى يعنى مش جيد جداً ولا ممتاز.. يعنى نص نص !!!

انا عندى قناعة شخصيه ان الافكار فى الألبوم عموماً قويه و اغلبها جيد جداً و فيه امتيازات كمان زى عشت سنين و مهزومه ونفسى احبك
و ميزه مهزومه و نفسى احبك تناولهم الموسيقى كان على مستوى الأفكار

و شكراً لتعقيبك الجميل يا حج