Medo-Diab

عمرو دياب .. حدوتة ذكرياااات و حكااااايات كل شاب فينا

Rate this Entry
Quote Originally Posted by Medo-Diab View Post
أولا مساء الخير عليكم جميعا


النهاردة بالصدفة كده كنت بسمع بلاي ليست لـ عمرو دياب ع الموبايل بتاعى و لحسن الحظ الاغانى اللى كانت موجودة كلها كانت ليا معاها ذكريات و حكايات و مواقف افتكرتها و كانت من أجمل اللحظات فى حياتى و أنا بستعيد ذكريات و مواقف حصلت معايا بـ أغانى لـ عمرو دياب و ده بيدل ان الرجل ده مش مجرد مطرب بس ده حياة احنا عايشين فيها من أول ما اتولدنا لـ حد بعد عمر طويل .

سمعت أغنية ..
ضحكت
و افتكرت سنة 2007 و تحديدا بعد لما الالبوم نزل بـ حوالى أسبوع او عشرتيام و افتكرت أول مرة سمعتها كان على امـ بـى ثـرى و وقتها كنت بسمع الالبوم كله و دى الاغنية الوحيدة اللى لافتيت انتبهى من أول مرة على عكس أغانى الالبوم عشان كان جديدة ان اسمع من عمرو دياب أغنية بالشكل ده و أساس اول لما سمعتها انا نفسى كنت بضحك و كنت حاسس ان عمرو دياب كمان بيضحكـ .

سمعت أغنية .. ما يتحكيش عليها
و افتكرت الفترة من 2005 لـ 2007 لما كانت الاغنية دى تعتبر مسيطرة على معظم الموبيلات الحديثة وقتها و اللى كانت بتشغل أغانى و تصور و كده و كنت كل لما أشوف حد مع موبايل حديث وقتها كان لازم أشوف الاغنية دى و تحديدا النغمة بتاعتها و كان كله مسجلها بـ اسم " زاى الملايكة " لان محدش كان واخد على اسم " ما يتحكيش عليها " ده .

سمعت أغنية .. بناديك تعالى
و افتكرت السنة اللى فاتيت و تحديدا لما كنت شغال فى هايبر وان و أول لما الاغنية دى نزلت مع أغنية هالله هالله على راديو دياب اف ام و بعدين نزلتها انا على الموبايل بتاعى و كنت ديما اشغلها التمن ساعات اللى كنت بقف فيهم فى الشغل لدرجة ان انا كنت بنام بغنيهم من كتر الفرحة انا الالبوم خلاص فضلو كم يوم و ينزل و كمان من صدمت و قوة عمرو دياب فى الاغنية الللى بعتبرها من أقوى أغنى عمرو دياب .

سمعت أغنية .. تملى معاكـ
و افتكرت أيام و العيد الصغير فى وقت الكيب لما كان نازل و موضة البلوفر بتاع عمرو دياب و وقتها معظم أصحابى جابو البلوفر ده فى العيد و انا كنت وقتها نازل مع اهلى عشان اجيبو و كنت فرحان جدا ان هجيب بلوفر عمرو و وقتها كان مكتوب عليها فى كل المحلات بلوفر عمرو دياب و انا فاكر وقتها مكنش نازل نفس اللون اللى ظهر بيه عمرو و كان نازا الوان تانية المهم ان انا مجيبتوش وقتها عشان كان اتنسف من السوق عموما و عدى العيد عليا عيد رخم بس بعد العيد جيبتو و برضو كنت فرحان جدا .

سمعت أغنية .. خلينا نشوفكـ
و افتكرت صيف 2004 لما كان عندى 14 سنة مع اولاد خالتى و هما مش مصريين من ليبيا و كان لسه وصلين مصر أول لما الالبوم نزل و كان بيحبو جدا و هما اللى اشترويلى الالبوم استريو وقتها و كان 18 جنية انا فاكر و كنت بحب أسمع الاغنية دى ديما و انا ماشى فى الشارع على وكمن

سمعت أغنية .. أصلها بتفرق
و افتكرت على طول حفلة مارينا 2010 و ذكريات اليوم ده مع أصحابى الديابيين و اللى يعتبر من اجمل ايام حياتى 30-7-2010 و افتكرت وقتها كوميكس كده كان منتشر على الفيس بوك و هو صورة الأخطبوط بول و هو موجود على البوم عمرو دياب و الناحية التانية كل البومات صيف 2010 و كمان افتكرت وقت لما الكفر نزل من شركات روتانا قبل الاغنية و كانت كلماتها كلها غلط و وقتها الديابية كانو مخنوقين من شركة روتانا جدا . وقتها كمان كانت اذاعة دياب اف ام لسه فاتحة مكملتش شهر او شهرين .

سمعت أغنية .. الماضى
و افتكرت ذكريات الطفولة اللى أكيد مكنتش فاهم وقتها حاجة غير جملة " بلاش نتكلم فى الماضى " و جملة " يا ارق ملاك انا قلبى ملاك " لان وقتها كان عندى 3 أو 4 سنين و كان الالبوم ده خالى هو اللى اشتره و لسه عندنا لحد دلوقتى و دى كانت أكتر اغنية بيشغلوها فى الالبوم فى بيت جدى الله يرحمو زمااااااان .

سمعت أغنية .. ديما فى بالى
و افتكرت وقتها طبعا خروى مع اولاد خالتى اللبيين و ديما كانت دى الاغنية اللى تشتغل الاول كما لو كانت الاغنية دى هى الهد و لما سألت بعد كده عرفت ان رتم الاغنية دى يعتبر فريحى زيادة عن اللزوم و ميحلش الخروج الا لازم الاغنية دى تشتغل .

سمعت أغنية .. لو كان يرضيك
و افتكرت والدتى ع طول لان كل لما أسمع الاغنية دى بتفكرنى بـ أمى لان أمى مش ديما بتسمع اغانى بس الاغنية دى بتحبها بطريقة فوق الخيال لدرجة انى بقيت كل لما تشتغل فى مكان او فى حتة افتكرها ع طول و كمان حبيتها أكتر بسبب أمى لان قبل كده خليتنى اشغالهاله ه الموبايل طول اليوم و كانت ديما امى تقولى عمرو بتاعك ده مش هيعمل اغنية زاى دى معنى كنت بمعها اغانى تانية زايها بس هى مكنتش بتقتنع بيهم .

سمعت أغنية .. و حكايتك ايه
و افتكرت ع طول شتاء 2005 و زاى ما بيقول الحب تحت المطر معنو مكنش حب كان مجرد اعجاب لانى كنت صغير جدا 15 سنة و كنت بعتبر الاغنية دة رومانسية جدا جدا فوق الخيال لانى كنت بركز فى كلامها أكتر لان كنت بقعد احفظ فى كلامها و أكتبو فى أجيندة كده كنت واخدها من الشغل اللى كنت في و كتبتها كتير جدا و بعدين الاجيندة ضاعت و الموزة طارت و الاغنية هى اللى استمرت معايا . و اتضح بعد كده ان الموزة دى كان اكبر منى بـ 7 سنين :d .

سمعت أغنية .. بقدم قلبى
و افتكرتها ع طول و افتكرت أجمل ايام و الله و بالظبط 9 - 7 - 2009 تانى حب حقيقى فى حياتى و كانت الاغنية دي ملازمنى فى كل حتة لدرجة انى كنت انا و هى حطينها كول تون و فاكر وقتها راهنت معاها و قلتلها ان عمرو دياب هيصور الاغنية دى كليب و هى طبعا صدقت بدون نقاش عشان هى كانت مقتنع انى مجنون دياب و الاهم انى حبيبتها فى عمرو دياب بعد ما كانت بتسمع ناس غريبة لا داعى لـ ذكر اسمها .

سمعت أغنية .. انت مقولتش ليه
و افتكرت على طول التسجيل و الشريط المتسجل عليها اغانى كوكتيل لعمرو دياب وقتها و افتكرت لما كنت بقعد فى شقتنا الجديدة اللى نقلنا فيها و أسمع الاغنية دى و أفضل اعيد فيها كتير من قوتها و كنت متخيل ان دى اقوى حاجة عند عمرو دياب لان وقتها أصلا كنت موهوم بـ البوم علم قلبى و كنت مش بنزل الشارع خالص و لا كنت بتفرج على تلفيزيون و لا كان عندى نت و لا كمبيوتر اصلا يا دوب التسجيل و الشرايط و بس .

سمعت أغنية .. حكايات
و افتكرت اجمل و أحلى سنين حياتى سنة 2007 و اللى بالنسبة ليا سنة مش هتتعوض خاااالص من كل حااجة من شغل و صحاب و رحلات و خروجات و طبعا كله كوم و عمرو دياب ده كوم تانى . طلعت مصيف فى الوقت دى يوم او يومين انا و اتنين صحابى و كنا وقتها بتنافس على انى اغنية اقوى فى الالبوم و كان الكل بيأكد على حكايات بعد لما بيسمعا و الاغنية دى من اقرب الكلمات اللى قالها عمرو دياب لـ قلبى جدا .

سمعت أغنية .. حبيبى و ع باله
و افتكرت على طول فرح بنت خالى اول بنات العائلة اللى اتجوزو و أول مرة اسمع فيها الاغنية دى كان فى فحها و بالبظبط يوم 30-8-2001 و الاغنية دى وقتها كانت مكسر الافراح كلها اللى فى مصر هى و اغنية منير بتاعت سو يا سو . بس عمرو كان الاقوى خصوص الحتة الراب اللى فى النص دى و اللى كان وقتها معظم الشباب بيتعلمو الرقص عليها .

سمعت أغنية .. حنية الدنيا فيك
و افتكرت لما كنت بزوغ من الشغل و اروح سايبر افريكانو سنة 2008 فى الدقى عشان اسمعها و كان وقتها بقى معيش فلاشات و لا موبايلات و لا كان حتى عندى نت فى البيت و فضلت ع الحال ده حوالى اسبوعين كل يوم ازوغ كده من ير ما حد يخد باله و اروح اسمعها هناك .

سمعت أغنية .. الله لا يحرمنى منك
و افتكرت ايام الثانوية و ايام 2005 و دى كانت اول أغنية اسمعها من الالبوم ده و تحديدا كان يوم 17 - 12 - 2005 على موبايل 6630 نوكيا و كان مع واحد معايا فى الشغل و كنت ديما أخرج من المدرسة اطلع على صاحبى ده اسمعها معاه حوالى 5 , 6 مرات كده و مكنش معاه اغانى لعمرو وقتها غير دى و كنت برضو حاسس نفس احساس اغنية ضحكت ان حاجة جديدة على عمرو برضو .

سمعت أغنية .. بعد الليالى
و افتكرت أيام ابتدئى لما كنت برجع من المدرسة ع طول افتح التلفيزيون الاقيها شغاله على فيلم ابيض و اسود كده كانت بتيجى ع التلفيزيون المصرى و قناة النيل للمنوعات و كنت متأثر جدا بصوت عمرو دياب مع مشاهد الفليم كان بتاع شادية باين او حد زاى كده .

سمعت أغنية .. تنسى واحدة
و افتكرت على طول سنة 2007 و ده مش وقت نزولها بس الاغنية دى فى الوقت ده كانت مأثرة معايا جدا و خصوصا مع حبيبتى وقتها لان هى كان فاكره ان عمرو دياب فى الاغنية دى مبسوط ان كل يوم بيحب واحدة و كده و مكنتش فاهمه اوووى و فاهمتها ان عمرو دياب هنا بيلوم قلبو على ان هو كل يوم مع واحدة عشان خاطر ينسى واحده عرفها قبل كده و مش عارف برضو و منوقتها كل لما اسمع الاغنية دى افتكر حبيبتى القديمة و افتكر المشاكل اللى كانت بتحصلى بسبب الاغنية دى

سمعت أغنية .. و هى عاملة ايه
و اللى افتكرت ع طول شريط تملى معاك اللى فضلت اتحايل ع الرجل بتاع الكاسيت وقتها عشان يجبهولى عشان خاطر الاغنية دى بس و اللى تعتبر السبب فى حبى لعمرو دياب و اللى بعتبرها بالنسبة ليا اقوى و افضل و احسن اغنية عملها عمرو دياب .

سمعت أغنية .. وحشتينى
و افتكرت ع طول ايام اعدادى لما كان فى واحد صاحبى بيحب بنت فى مدراسة جانبينا و كان كل يوم لازم يكتبلها الاغنية دى فى وارقة و نروح انا و هو اطلع انا ع السور عشان كنت طويل و احدفها للبنت و اخد منها هى كمان وارقة كانت ديما ترد عليه فيها بـ اغنية لـ شيرين وجدى وقتها . و سبحانة فضل على الحال ده 3 شهور لحد ما الترم خلص هو يبعت و هى تبعت و انا ابقى الموصلتى بتاعهم و هو لا كلمها و لا هى كلمتو بعد كده و كانو مقضينها نظرات و بس


طبعا بتأسف على الاطالة الكبيرة بس انا حبيت أعرض بعض مواقف و حكايات حصلتلى فى حياتى متعلق بـ عمرو دياب و ده لو دل على حاجة فـ هيدل ان عمرو دياب مش مجرد مطرب بيعمل اغنية و خلاص .. لا عمرو دياب ده حياة و حدوتة عايشة جوه كل شاب فينا و أكيد فى كتير منكم بتحصلو و حصلتلو و هتحصلو مواقف زاى دى كتير .. عمرو دياب ملازم فى حياتى من صغرى و فى كل فترات حياتى و فى كل مواقفى و حكايتى و ذكرياتى موجود عمرو دياب .. للعلم دى مش كل المواقف اللى حصلت معايا فى أكتر من كده بس انا كتبت دول لما سمعت الاغانى دى بس

و أسف مرة تانية ع الاطالة و شكرا لكل اللى اهتم و قراء الموضوع .. تحياتى

Submit "عمرو دياب .. حدوتة ذكرياااات و حكااااايات كل شاب فينا" to Facebook Submit "عمرو دياب .. حدوتة ذكرياااات و حكااااايات كل شاب فينا" to Digg Submit "عمرو دياب .. حدوتة ذكرياااات و حكااااايات كل شاب فينا" to del.icio.us Submit "عمرو دياب .. حدوتة ذكرياااات و حكااااايات كل شاب فينا" to StumbleUpon Submit "عمرو دياب .. حدوتة ذكرياااات و حكااااايات كل شاب فينا" to Google

Tags: None Add / Edit Tags
Categories
Uncategorized

Comments

  1. Ahmed.Mahmoud's Avatar

    دا كلام قلوب يا ميدو